Raqamli texnologiyalar vaziri Sherzod Shermatovning Xitoyga tashrifi chog'ida Xitoy Davlat sug'urta korporatsiyasi China Export & Credit Insurance Corporation (SINO SURE) rahbariyati bilan muzokaralar bo'lib o'tdi. Raqamli tarmoq va infratuzilmani rivojlantirishga qaratilgan istiqbolli loyihalarni moliyalashtirish va sug'urta bilan ta'minlash masalalari muhokama markazida bo'ldi.
Uchrashuvning asosiy yo'nalishi raqamlashtirish sohasidagi keng ko'lamli tashabbuslarni qo'llab-quvvatlash uchun sug'urta va moliyaviy vositalardan foydalanish imkoniyatlariga qaratildi. Tomonlar vakillari zarur hujjatlarni rasmiylashtirish tartib-taomillarini soddalashtirish bo'yicha chora-tadbirlarni muhokama qildilar, shuningdek, qo'shma loyihalarni amalga oshirish samaradorligini oshirishga imkon beradigan mexanizmlarni yaratish bo'yicha yondashuvlarni kelishib oldilar.
Amaliy hamkorlik va ikki tomonlama hamkorlikni mustahkamlash masalalariga alohida e'tibor qaratildi. Tomonlar raqamli infratuzilmani modernizatsiya qilish va O'zbekistonda zamonaviy texnologiyalarni joriy etishni jadallashtirish maqsadida uzoq muddatli sheriklik aloqalarini o'rnatishga tayyorligini tasdiqladilar.
Erishilgan kelishuvlarni amalga oshirish milliy raqamli iqtisodiyotni rivojlantirish va xalqaro texnologik hamkorlikni kengaytirishning asosiy omillaridan biri sifatida qaralmoqda.
