O'zbekiston iqtisodiyot va moliya vazirining o'rinbosari Ilhomjon Umrzakov 19 iyun kuni Xitoy eksport-import banki raisi Chen Xuayyu boshchiligidagi delegatsiya bilan uchrashuv o'tkazdi. Muzokaralarda iqtisodiyot va moliya vazirligi rahbariyati hamda Xitoy Eksimbank vakillari ishtirok etdi.
Suhbat davomida asosiy e'tibor "Markaziy Osiyo — Xitoy"ikkinchi sammiti doirasida O'zbekiston va Xitoy davlatlari rahbarlari darajasida erishilgan kelishuvlarni amalga oshirish bo'yicha ikki tomonlama hamkorlikni faollashtirish masalalariga qaratildi. Infratuzilma tarmoqlari, jumladan gidroenergetika, transport va telekommunikatsiyalar bo'yicha qo'shma loyihalarni moliyalashtirish istiqbollari muhokama qilindi. Davlat-xususiy sheriklik mexanizmlari yordamida amalga oshirilayotgan tashabbuslarga alohida e'tibor qaratildi.
Xitoy eksport-import banki vakillari O'zbekistonning xalqaro reytinglardagi barqaror mavqeini va xorijiy investorlar uchun yaratilayotgan ijobiy investitsiya muhitini qayd etdilar. "Bir kamar, bir yo'l" tashabbusi doirasida hamkorlikni yanada rivojlantirish, shuningdek, kichik va o'rta biznesni qo'llab-quvvatlash hamda iqtisodiyotning ishlab chiqarish tarmoqlariga investitsiyalarni jalb etish ustuvor yo'nalishlar qatoriga kiritildi.
Muzokaralar yakunida tomonlar xalqaro moliya bozorlari, investitsiyaviy hamkorlik va infratuzilmani rivojlantirish, shuningdek, moliyaviy barqarorlikni ta'minlash masalalari bo'yicha maslahatlashuvlarni davom ettirish niyatini tasdiqladilar.