O'zbekiston va ICCROM madaniy merosni saqlash sohasidagi hamkorlikni kengaytirmoqda

Parijda madaniyat va san'atni rivojlantirish jamg'armasi raisi Gayane Umerova va madaniy meros agentligi direktori Bahodir Abdikarimov boshchiligidagi O'zbekiston delegatsiyasining madaniy boyliklarni saqlash va tiklash masalalarini o'rganish bo'yicha xalqaro markaz (ICCROM) Bosh direktori Aruna Francesca Mariya Gujral bilan uchrashuvi bo'lib o'tdi.

Muzokaralar yakunida O'zbekiston madaniy meros agentligi va ICCROM o'rtasida o'zaro anglashuv memorandumi imzolandi. Hujjat mamlakatning madaniy merosni muhofaza qilish va undan oqilona foydalanish sohasidagi salohiyatini mustahkamlashga qaratilgan hamkorlikning strategik yo'nalishlarini belgilaydi.

Memorandum to'rtta ustuvor yo'nalishni qamrab oladi:

1. Jahon merosi ob'ektlarini barqaror boshqarish. Tomonlar YUNESKO ro'yxatiga kiritilgan madaniy ob'ektlarni boshqarishning zamonaviy modellarini ishlab chiqish bo'yicha sa'y-harakatlarni muvofiqlashtirishga kelishib oldilar.
2. Arxitektura yodgorliklarini saqlashga yondashuvlarni modernizatsiya qilish. Tarixiy va me'moriy ahamiyatga ega ob'ektlarda tiklash ishlarida ilmiy usullar, xalqaro standartlar va raqamli texnologiyalarni joriy etish diqqat markazida.
3. Muzey sektori va ilmiy savodxonlikni rivojlantirish. Hamkorlik muzey xodimlarining malakasini oshirishni qo'llab-quvvatlash, ta'lim dasturlarini ishlab chiqish, ilmiy va interaktiv formatlar orqali madaniy boyliklarni ommalashtirishni o'z ichiga oladi.
4. Markaziy Osiyoda mintaqaviy hamkorlikni kengaytirish. Tomonlar mintaqada nomoddiy madaniy merosni saqlash bo'yicha harakatlarni muvofiqlashtirishga va davlatlararo tajriba almashishni rag'batlantirishga kelishib oldilar.

Tashabbus O'zbekistonning xalqaro madaniy muloqotning faol ishtirokchisi sifatidagi mavqeini mustahkamlashga qaratilgan. ICCROM bilan hamkorlik madaniy siyosat sohasida ilg'or tajribalar, ilmiy ekspertiza va texnologik yechimlarni jalb qilish imkoniyatlarini ochadi. O'zbekiston xalqaro tashkilotlar bilan hamkorlikni rivojlantirishni merosni muhofaza qilish va madaniy diplomatiya sohasini uzoq muddatli modernizatsiya qilish uchun strategik platforma deb biladi.