O'zbekiston Respublikasi investitsiyalar, sanoat va savdo vazirining o'rinbosari Ilzat Qosimov Xitoyning Lushang Group davlat korporatsiyasi delegatsiyasi bilan muzokaralar olib bordi. Uchrashuv O'zbekistonda strategik muhim tarmoqlarda istiqbolli hamkorlik va qator loyihalarni amalga oshirish muhokamasiga bag'ishlandi.
Tomonlar zamonaviy logistika markazlarini tashkil etish, farmatsevtika mahsulotlari ishlab chiqarishni tashkil etish, shuningdek, Xitoy tomoni ishtirokida ta'lim muassasalarini ochish imkoniyatlarini ko'rib chiqdilar. Investitsiyalarni jalb qilish va Xitoyning eng yaxshi amaliyotlarini O'zbekistonning infratuzilma va sanoat rivojlanishiga moslashtirish masalalariga alohida e'tibor qaratildi.
1992 yilda Shandong provinsiyasida tashkil etilgan Lushang Group savdo, tibbiyot, moliya, logistika, ta'lim va investitsiyalar sohalarida faoliyat yurituvchi ko'p tarmoqli korporatsiyadir. So'nggi ma'lumotlarga ko'ra, kompaniyaning aktivlari 185 million AQSh dollaridan oshadi.
Uchrashuv yakunida tomonlar muloqotni yanada chuqurlashtirish muhimligini ta'kidlab, qo'shma loyihalarni amalga oshirishga tayyorgarlik ko'rish bo'yicha aniq qadamlar qo'ydilar. Hamkorlikning kelgusi bosqichlari O'zbekistonda investitsiya jarayonlarini jadallashtirish va asosiy tarmoqlarni rivojlantirishga xizmat qilishi kutilmoqda.
